Fyrri mynd
Næsta mynd
English

Ábending

Aðildarsveitarfélög

Mosfellsbær

Seltjarnarnes

Kjósarhreppur

Viðbrögð við fráviki í neysluvatni

Í dag 11. janúar fékkst staðfesting á að í neysluvatnssýni sem Veitur ohf. tóku á þriðjudag þann 9. janúar sl. greindist ein E.coli í þremur sýnum úr borholum á vatnsverndarsvæðinu í Heiðmörk. Sýnatakan var gerð vegna mikils vatnsveðurs. Neysluvatnið í þessum holum er m.a. leitt til Seltjarnarnes en er ekki notað í Mosfellsbæ.

Um leið og upp kom grunur um frávik í sýni var samstundis lokað fyrir dreifingu á neysluvatni frá þessum borholum til neytenda. Sama dag, þann 9. janúar, tók Heilbrigðiseftirlit Reykjavíkur sýni úr dreifikerfinu, sem var í lagi.

Í gær, miðvikudag 10. janúar, tóku Veitur endurtekin sýni og skv. upplýsingum frá rannsóknarstofu eru sýnin í lagi. Einnig tók Heilbrigðiseftirlit Reykjavíkur aukalega sýni af neysluvatninu úr dreifikerfinu og sýna rannsóknarniðurstöður að vatnið er í lagi.

Um er að ræða eina E.coli í 100ml, en skv. reglugerð um neysluvatn nr. 536/2001, á E.coli ekki að finnast í neysluvatni. Ljóst er að um minnsta mögulega frávik er að ræða.

Heilbrigðiseftirlit Kjósarsvæðis telur miðað við fyrirliggjandi upplýsingar að ekki þurfi að grípa til frekari aðgerða og að neysluvatnið sé öruggt til neyslu.

Heilbrigðiseftirlitið tekur mánaðarlega sýni af neysluvatninu í almenningsveitum á Kjósarsvæði samkvæmt reglubundinni eftirlitsáætlun og er metið eftir aðstæðum hverju sinni hvort þurfi viðbótar sýnatökur. Viðbótarsýnataka af neysluvatni verða tekin á morgun í ljósi þessa atburðar.